Facebook Twitter Youtube Instagram Español | Euskera

ASTEBURU BIKAINAK EUSKALDUN TXAPELKETAKO LEHENENGO HILABETEA BOROBILDU DU

01-KOAPIRILA-KO2025

Gorlara Igoera Euskaldun Txapelketako seigarren proba izan da eta bertako partaidetza arrakastarekin batera sailkapen nagusian Aimar Galdos Alonso (EUF) sendotu da txapelketako lidergoan.

ASTEBURU-BIKAINAK-EUSKALDUN-TXAPELKETAKO-LEHENENGO-HILABETEA-BOROBILDU-DU

(c) Jose Vidal Merino Cruz

Lehenengo hilabetea gaindituta sei proba lehiatu dira Euskaldun Txapelketaren baitan. Ohi bezala Zumaia Sariak abiada eman zien ETxFko txapelketen egutegiari. Urola ibaiaren ondoan lehiatutako sprint klasikoak Euskadiko txapeldunaren garaipena ekarri zuen. Diego Ruiz de Arkaute Diaz de Aldak, Caja Rural-Alea taldearen lan onari etekina atera zion sendo irabazita. Zumaiako hitzordu klasikoaren ostean Ereñoko Udala Sari Nagusi berrituaren txanda etorri zen. Luzatutako eta gogortutako ibilbideak lasterketa ikusgarria ekarri zuen. Bizkaiko kostaldeko gora beherek ihesaldi handi bat ahalbidetu zuten eta Omako Maldaren igoera birritan eginda lasterketa zeharo txikitu zuten. Azken txanpan seikote indartsu bat osatu zen lasterketa buruan eta Gorka Corres Ibañez de Opakuak (CJA) hiru eraso indartsu jo ostean bakarrik helmugaratzea lortu zuen.

 

Berriatuako San Gregorio Sarian Bizkaiko kostaldeko gora beherek protagonismoa bereganatu zuten berriz ere. Tropelak sustatuko erritmo azkarrak ez zuen etenik izan eta ondorioz saiakera ugari izan baziren ere ez zen ihesaldirik izan egun osoan zehar. Asterrikako Mendateak dagoeneko txikituta zegoen tropela guztiz desegin zuen eta Iñaki Trujillo Diazek (EIS) jaitsiera ausart bat eginez irekitako metroak onak egin zituen helmuga lerrora arte. Laukiz Udal Sarian gidoi berdintsua jarraitu zuen lasterketak ihesaldi gabe. Unbeko Mendateko azken bi igoeretan Euskadi Fundazioa taldeak erritmoa handitu zuen eta Laukizeko sprinta desegiten bilatu zuten gazteek. Azken kilometroetan hainbat txirrindulari ahalegindu baziren ere tropelak saiakera guztiak kontrolatu zituen eta sprintean berriz ere Eiser-Hirumet taldeko txirrindulari batek altxa zituen eskuak, kasu honetan Eder Moreno Agirrezabalaga izan zen garailea.

 

Azken asteburua, SF-Haitzasko Oroimenezkoarekin eta 50. edizioa bete duen Gorlara Igoerarekin guztiz arrakastatsua izan da. Bi lasterketetan ia 200 txirrindularik parte hartuta ikuskizun itzela bizi izan dute txirrindularitza zaleek. Markina-Xemeinen lasterketa ikusgarria lehiatu zuten txirrindulariek uneoroko gora beherekin. Lekoitz-Ganeko azken igoeran Pablo Arak (TEL) eta Yago Agirrek (EUF) aldea ireki zuten baina jaitsiera horretan izandako eroriko mordoak tropela lasaitzea eragin zuen eta orduan berriz ere tropela egituratu zen. Azken kilometroetan bakarkako hainbat eraso suertatu ziren eta Markinako herrira sartzen Emilio Reinoso Sanchezek (VIC) erasoa jo zuen metro batzuk ireki zituen garaipena lortzeko balio izan zitzaizkionak.

 

Gorlara Igoerak Euskaldun Txapelketaren hitzordu nagusia ekarri zuen. Urteroko partaidetza eta antolakuntza arrakastak erantzuna izan zuen bizitako ikuskizunean. Gorlara lehenengo igoera hasi orduko Finisher taldeak ardura hartu zuen eguneko ihesaldi handia kontrolatzeko asmoarekin. Erritmo gogorra jarrita tropelak hainbat kide galdu zituen. Zumarragatik pasatzean eroriko bat izan zen tropelean eta bertan egondako zaurituak erietxera eraman bitartean lasterketa gelditu behar izan zen Asentzioko Mendatea hasi aurretik. Geldiune horrek airea eman zion ihesaldiari eta lasterketa berriz ere abiatzean 2 minutuko aldearekin hasi ziren txirrindulariak. Mikel Uncilla Aldosoro (CJA) ihesaldiko azken txirrindularia izan zen tropelak harrapatu zuena dagoeneko Gorlako maldetan. Talde nagusiko talde guztietako txirrindulariek erasoa jo zuten, Caja Rural-Alea, Finisher, Euskadi Fundazioa, Essax… Unai Ramos Murillok (FSH) eraso jo zuen tontorrera iristear zirenean eta tartea mantendu bazuen ere, azken metroetan Jesse Marisek (ESX) beste eraso bat jo zuen eta Ramos harrapatu eta helmugara arteko bidea bakarrik eta dagoeneko garaile egin zuen.

 

Txapelketako sailkapen nagusiari dagokionez Aimar Galdos Alonsok (EUF) lider maillota jantziko du hurrengo igandeko hitzorduan Zornotzan. Sailkapen nagusiko elite onena Iñaki Trujillo Diaz (EIS) da eta talde onena Euskadi Fundazioa Taldea da.