LEHENDAKARI TXAPELKETA AZKEN TXANPARAKO BIDERATUTA

Lehendakari Txapelketak protagonismo nabarmena izan du afizionatu egutegian azken lau asteetan. Muxikako San Roman Sarian Mendata-Urrutxuako zirkuituak lasterketa bizia eskaini zuen abuztua hasteko. Hasierako erasoaldiak bidea eman zion eguneko ihesaldiari. Ihesitako txirrindularien joak aukera eman zien errenta mantentzeko tropelean kontraeraso saiakerak uneorokoak baziren arren. Caja Rural-Alea eta Electro Alavesa taldeak tropel buruan kontrolatzen ahalegindu baziren arren kontraerasoek ez zuten etenik eta geroz eta txirrindulari gehiagok lortzen zuten ihesaldiraino iristea, errenta txikitzen ez zen bitartean. Azken itzulian ihesaldiak errenta nahikoa zuen helmugaraino iristeko eta Urrutxuako azken kilometroetan atzetik iritsitako Unai Ramos Murillok (FSH) eraso bortitza jo eta helmugarainoko bidea egin zuen eskuak altxatzeko. Hurrengo egunean, Sopela Udala Sarian berriz ere ihesaldi handi batek protagonismoa bereganatu zuen. Diferentzia txikia mantendu bazen aurreko taldea oso handia izan zen. Azken kilometroetan hiru txirrindulariek errenta lortu zuten, Marc Rubirola Vila (CJA), Eder Moreno Agirrezabala (EIS) eta Xabat Manso Anbustegi (EIB) ahalegindu ziren helmugaraino bidea egiten baina tropelak azken txanpan hauek harrapatu eta sprinta bideratu zuen. Iker Villar Galdeanok (CJA) lehenengoa jo zuen Sopelako maldan eta irekitako metroei esker garaipena eskuratu zuen iguzkitzarrak.

Ama Birjinaren egunean Aiara Zirkuituan beroak markatu zuen lasterketa. Horren ondorioz ihesaldi oso handi osatu zen hasierako kilometroetan eta tropelaren indar eta jo faltagatik helmugarainoko bidea egin zuten ihesitako txirrindulariek. Helmugako sprintean berriz ere Iker Villar Galdeano izan zen azkarrena eta besoak altxatu zituen Jorge Gonzalez Xurderen (EUF) eta Eder Moreno Agirrezabalaren (EIS) aurretik. Hurrengo egunean Leintz Bailarari Itzulian Gatzagako mendatean gora erabaki zen lasterketa. Igoera bikoitza egin bazen ere bigarrena, 14 kilometroren faltan, izan zen erabakigarria. Ruben Rodrigues (EUF) izan zen indartsuena malda gora errenta nabaria lortuz eta tarte horri eutsiz garaipena eskuratu zuen Aretxabaletan. Laudio Sarian, hirugarren eguna jarraian, Malkuartuko mendateak mina egin zuen lehenengo itzulitik. Lau igoeren gogortasunak tropela txikitzea eragin zuen eta azken igoeran Hugo Tapizek (FSH) bidea egin zuen bakarrik eta helmugako maldara bakarrik iritsita garaile suertatu zen.

Azken asteburua benetan bizia izan den bataz besteko abiadura handiak lortu dituztelako txirrindulariek. Elgoibarreko Etxanizen Oroimenezkoa bereziki azkarra izan zen 45 kilometro orduko bataz besteko abiadura lortu zutelako txirrindulariek ibilbidearen 105 kilometroetan. Kalbarioko Mendatea birritan gainditu behar izan zuten arren honek ez zuen asko apaldu abiadura. Bigarren igoeran Caja Rural-Aleak erritmo bizia jarri zuen tropela desegiteko eta sprinterrak atzean uzteko. Ahalegindu bai baina ez zuten lortu eta azkenean 50 txirrindularitako taldetxoa iritsi zen helmugara eta bertan azkarrena Jorge Gonzalez Xurde izan zen. San Bartolome Sari Nagusian ohiko gidoia sprint handi bat ikustea izan bada ere aurten gidoia aldatu egin da. Hasierako kilometroetan ihesaldi batek egonkortasun nabaria lortu zuen eta uneoro 30-40 segundutako errenta mantendu zuten. Ihesaldi handitik, 40 kilometroren faltan, Hugo Tapiz (FSH), Antonio Gonzalez Torres (CJA) eta Iker Perez Lucas (CJA) aurreratu ziren. Azken itzulian sartuta Iker Perez bakarrik geratu zen lasterketa buruan. Bizkaiko Begiratokiko azken kilometroan Adur Tapia Iriartek (VIV) eraso indartsua jo zuen eta Gorka Corres Ibañez de Opakuarekin (CJA) lasterketa bururaino iritsi zen. Malda behera Iker Perez atzean utzi zuten eta Alain Suarez Fernandez (EUF) lasterketa burura iritsi zen baita. Hiru txirrindulariek Gernikarainoko bide azkarra errelebo onak ematen iraun zuten eta atzean Eiser-Hirumet taldea antolatu bazen, bizkaitarrak ez ziren gai izan errenta iraultzeko eta sprintean Gorka Corres Ibañez de Opakua gailendu zen.

Lehendakari Txapelketaren lidergoan Sergio Gutierrez Vargas (GOM) mantentzen da erregulartasun handia erakutsiz, 95 punturekin. Bigarren sailkatua, 71 punturekin, Asier Castilla Pikatza (EUF) da eta hirugarren postuan maillot laranja jantziz Marc Rubirola Vila (CJA) dago 58 punturekin. Maillot laranjaren lehian lau txirrindulari murgilduta daude 10 punturen bueltan: Rubirola bera, Jon Conejero Lakontxa (ELE), Gorka Corres Ibañez de Opakua (CJA) eta Igor Iriarte Sanz (EUL).